Ölvaður í hraðakstri

Fimm óku of hratt og mældist ein bifreið á 146 kílómetra hraða.

Lögreglan á Suðurnesjum hafði um helgina afskipti af ellefu ökumönnum, sem gerðust brotlegir við umferðarlög. Fimm óku of hratt og mældist bifreið karlmanns á fimmtugsaldri á 146 kílómetra hraða þar sem hámarkshraðinn er 90 kílómetrar. Annar þessara fimm var ölvaður undir stýri og var því handtekinn og sviptur ökuréttindum. Sá þriðji talaði í farsíma, án handfrjálss búnaðar,  meðan á hraðakstrinum stóð. Að auki klippti lögregla númerin af nokkrum bílum sem ýmist voru óskoðaðir, ótryggðir eða hvoru tveggja. Einn þessara bíla hafði ekki verið skoðaður síðan 2010.