Ökuníðingur játar hraðakstur

Ökuníðingurinn sem mældist á 201 km hraða á aðfararnótt fimmtudags hefur játað að hafa ekið bílnum umrædda nótt, en hann hafði áður þvertekið fyrir það. Hann sinnti ekki stöðvunarmerkjum lögreglu, en þar sem lögreglan sá númer bílsins reyndist þeim auðvelt að hafa uppi á honum.

Enn sem komið er neitar ökumaðurinn þó að hafa ekið á þeim hraða sem hann er sakaður um þó hann játi að hafa verið á ólöglegum hraða. Samkvæmt frétt í Morgunblaðinu í dag var bíllinn einnig illa útbúinn, á gatslitnum dekkjum og án hljóðkúts. Í skoðun sem lögregla lét fara fram var bíllinn dæmdur óhæfur til aksturs.

Maðurinn verður væntanlega sviptur ökuréttindum á næstunni.