Nýr skóli í Innri-Njarðvík 2017
- og Háaleitisskóli heildstæður
Fræðsluráð Reykjanesbæjar er að skoða möguleika á því að gera Háaleitisskóla á Ásbrú að heildstæðum skóla. Þá verði nemendur í honum frá 1. til 10. bekkjar í stað 7. bekkjar í dag.
Í fundargerð fræðsluráðs er sagt að skoða þyrfti samstarf við Keili um kennslu valgreina, verkefni Öndvegisskóla og frumkvöðlasetrið á Ásbrú . Kallað verði eftir hugmyndum frá stjórnendum skólans um útfærsluna og nýta stuðning annarra skóla við valgreinar. Nemendur annarra skóla gætu einnig sótt valgreinatíma í Keili.
Í fundargerð fræðsluráðs er einnig rætt um framtíðarstöðu skólahalds í Innri-Njarðvík. Fræðslustjóri skýrði frá hugmyndum um að vinna að málinu með íbúum hverfisins og í fræðsluráði. Undirbúningur er hafinn og stefnt að því að nýr skóli taki til starfa 2017.
