Nýjar sprungur við Krýsuvíkurberg

Nýjar sprungur hafa komið í ljós niður við Krýsuvíkurberg og er talið víst að þær hafi myndast við Suðurlandsskjálftann á dögunum. Í klöppina á bjargbrúninni ofan við Hælsvík, þar sem komið er niður að berginu, er komin ný sprunga það breið að hægt er að stinga hendi niður á milli. Einnig hefur opnast stór sprunga, á að giska 15 – 20 metra löng, rétt vestan við grasbalann ofan á brúninni. Ekki er ólíklegt losnað geti úr bjargbrúninni vegna þessa og ætti fólk því að gæta varúðar þegar það fer þarna um.

Að sögn Óskars Sævarssonar í Grindavík hefur ekki orðið vart við neinar breytingar í Kleifarvatni, líkt og gerðist við síðasta Suðurlandsskjálfta þegar vatnsborðið lækkaði verulega.