Ný þjónustumiðstöð Sveitarfélagsins Voga rís við Iðndal

Ný þjónustumiðstöð rís í Vogum

Framkvæmdir við nýja þjónustumiðstöð Sveitarfélagsins Voga standa nú yfir í Vogum. Þjónustumiðstöðin er að rísa á lóðinni sem er næst bæjarskrifstofunum, í Iðndal 4.

Um er að ræða myndarlegt stálgrindarhús, sem mun uppfylla þarfir umhverfisdeildar sveitarfélagsins með öllum þeim tólum, tækjum og búnaði sem þeirri starfsemi fylgir. 

Í hönnuninni er gert ráð fyrir þvottastæði fyrir almenning þar sem fólk getur loks þrifið bíla sína. Síðast en ekki síst verður sérrými afmarkað í húsinu þar sem einn af dælubílum Brunavarna Suðurnesja verður framvegis staðsettur. Það styttir til muna útkallstíma slökkviliðsins, segir á vef Sveitarfélagsins Voga.