Ný aðkomuleið komufarþega opnuð á fullveldisdaginn

Ný leið komufarþega að 1. hæð flugstöðvarinnar verður opnuð á fullveldisdaginn, 1. desember. Í framhaldinu verður byrjað að brjóta niður og fjarlægja stigann sem farþegar ganga nú um á leið úr flugvélum niður í komuverslunina. Múrbrot og niðurrif verður því stundað áfram næstu vikur á þeim svæðum hússins sem verið er að breyta. Þessum þáttum verksins fylgir vissulega hávaði, ryk og titringur en reynt er eftir mætti að brjóta veggi og annað slíkt á nóttunni, þegar minnst er um að vera í flugstöðinni.  Á myndinni hér til hægri má sjá afrakstur múrbrotsins utan dyra.

 

 

Staða nokkurra verkþátta er annars sem hér segir:
Steypuvinnu vegna suðurstækkunar er að mestu lokið og verið er að ganga frá stiga, lyftu og rúllustiga milli hæða í nýbyggingunni.

Búið er að glerja þakglugga og unnið að því að mála stálvirki og kanta. Þegar því verki lýkur verður bráðabirgðalandgangurinn rifinn og fjarlægður.

Afstaðinn er bráðabirgðaflutningur þjónustu og viðskipta á 2. hæð til að rýma fyrir framkvæmdum á austursvæði hæðarinnar. Hér er átt við veitingaþjónustu ISG, Optical Studio, Landsbanka Íslands, Leonard og brottfararverslun Fríhafnarinnar.

Lokið er við að leggja snjóbræðslukerfi og gangstéttarhellur á svokallaða norðurleið við flugstöðvarbygginguna, þ.e. á yfirbyggða göngustíginn út á bílastæði starfsmanna og langtímastæði farþega. Óhætt er að segja að starfsmenn hafi beðið með óþreyju eftir að sjá fyrir enda þessa verkþáttar!

Vefur flugstöðvarinnar greinir frá þessu.