Nemendur Heiðarskóla rækta upp útivistarparadís í gömlu grjótnámunni við Heiðarholt

Fyrirhuguð útikennsla á svæðinu

„Þetta á að verða útivistarparadís í framtíðinni, bæði fyrir nemendur Heiðarskóla og fyrir íbúa Reykjanesbæjar,“ segir Gunnar Þór Jónsson skólastjóri Heiðarskóla en formlegt upphaf uppbyggingar í gömlu grjótnámunni norðan við Heiðarholt fór fram í morgun þegar nemendur Heiðarskóla gengu þangað í rokinu og kveiktu varðeld. Fyrirhugað er að þarna verði um 1700 trjám plantað og útikennsla verði stunduð þarna á komandi árum. Hugmyndin kviknaði síðasta haust og styrkur fékkst frá bænum uppá 150 þúsund krónur.Ýmsar hugmynd hafa verið á lofti með það sem gæti verið í gryfjunni sem hefur staðið auð í fjölda ára og oftar en ekki hefur fólk stundað það að fleygja þangað ýmsum úrgangi. Það er hins vegar úr sögunni. Gunnar segir mikla möguleika vera fyrir hendi á svæðinu. „Við höfum hugsað okkur að vera með kennslu þarna, helst þá í náttúrufræði og íþróttum en fyrirhugað er að reisa þarna skýli eða jafnvel húsnæði en þetta er hugsjónar verkefni sem tekur tíma að rækta upp,“ sagði Gunnar að lokum.