Mugison seldist upp á einum degi

Uppselt varð á tónleika Mugison í Bergi í Hljómahöll á innan við sólarhring. Frá því miðasala opnaði tók ekki nema 15-16 tíma að selja alla miðana á tónleikana.

„Það hefur líklega aldrei selst svona hratt á neinn viðburð sem við höfum staðið fyrir frá því að húsið opnaði sem Hljómahöll í apríl í fyrra. Mugison er sjálfur í skýjunum með viðbrögðin en hann hefur lítið látið fara fyrir sér sl. þrjú til fjögur ár,“ segir Tómas Young, framkvæmdastjóri Hljómahallar við Víkurfréttir.

Verið er að kanna möguleikann á aukatónleikum en þó er ekkert víst að það sé hægt að koma þeim að þar sem Mugison verður á miklu ferðalagi um landið og með þétta dagskrá. „En það er aldrei að vita fyrst að áhuginn er svona mikill,“ segir Tómas að endingu.