Mjög góður afli skipa frá Grindavík

Línubátarnir frá Grindavík eru komnir á fullt eftir sumarstoppið og eru að rótfiska.
„Þetta er allt komið í gang og aflinn er mjög góður hjá skipunum héðan,“ sagði Sverrir Vilbergsson hafnarstjóri Grindavíkurhafnar í samtali við Víkurfréttir og taldi útlitið mjög gott.

„Vísisbátarnir hafa verið að rótfiska fyrir austan en bátarnir frá Þorbirni Fiskanes hafa landað hér í Grindavík.“

Geirfugl GK landaði 61 tonni í gær og Valdimar GK landaði 54 tonnum í gær. Þá kom frystitogarinn Hrafn Sveinbjarnarson GK í land með 440 tonna afla. Aflaverðmæti er um 45 milljónir króna eftir 18 daga veiðiferð.
Mynd: Hrafn Sveinbjarnarson GK; af vef Þorbjarnar Fiskaness.