Mistök við sýnatöku í Helguvík höfðu ekki áhrif

Mistök sem gerð voru við töku ryksýna í mælistöð Orkurannsókna Keilis við Hólmbergsbraut höfðu ekki áhrif á útkomu mælinga á magni arsens í andrúmslofti við kísilver United Silicon. Frá þessu er greint á vef RÚV.

Líkt og fram kom í frétt Víkurfrétta í gær voru mistökin þess eðlis að þegar ryksíur úr mælistöðinni voru sendar til rannsóknarstofunnar ALS í Svíþjóð var ekki send svokölluð „núllsía“ með. Það er ónotuð sía úr sama pakka og hinar síurnar sem notaðar voru. Það er gert því ýmis efni geta leynst í ónotuðum síum. Mælingar á tímabilinu október til desember á síðasta ári sýndu að styrkur arsens í andrúmslofti í nágrenni Helguvíkur var mun hærri en gert var ráð fyrir í umhverfismati. Í gær sendu Orkurannsóknir Keilis bréf til Umhverfisstofnunar þar sem tilkynnt var að þær háu tölur sem mældust séu úr öllu samhengi við raunverulega losun frá United Silicon.

Einnig leikur grunur á að mistök hafi verið gerð við efnagreiningar á ryksýnum hjá sænsku rannsóknarstofunni. Gróflega fimmföld aukning var á öllum efnum í lok árs en Þorsteinn Jóhannsson, teymisstjóri hjá Umhverfisstofnun, sagði í samtali við Víkurfréttir í gær að eðlilegra hefði verið að aukningin hefði verið mis mikil á milli efna.