Miklum verðmætum og lyfjum stolið

Brotist var inn í íbúðarhúsnæði í umdæmi lögreglunnar á Suðurnesjum um helgina og þaðan stolið tveimur farsímum að verðmæti um 150 þúsund krónur, 1000 evrum, skiptimynt og lyfjum sem voru í skrifborðsskúffu. Á vettvangi mátti sjá að opnunarfag stofuglugga á vesturhlið hússins stóð galopið. Engin önnur ummerki voru sjáanleg um innbrot í húsið.

Þá var brotist inn í bifreið í umdæminu og stolið úr henni tölvu, myndavél, tösku með snjóbretti og öllum búnaði að verðmæti um 540 þúsund krónur. Málin eru til rannsóknar hjá lögreglu.