Menntaráð fagnar nýrri tómstundastefnu Reykjanesbæjar

Menntaráð Reykjanesbæjar lýsir yfir eindregnum stuðningi við drög að nýrri tómstundastefnu bæjarins, sem kynnt voru á fundi ráðsins þann 6. júní sl. Gunnhildur Gunnarsdóttir, forstöðukona Fjörheima og 88 hússins, og Ólafur Bergur Ólafsson, frístundaráðgjafi, kynntu stefnuna fyrir ráðinu og svöruðu spurningum um áherslur og framtíðarsýn.

Í umsögn sinni fagnar menntaráð metnaðarfullu starfi sem unnið hefur verið við mótun stefnunnar og segir hana endurspegla skýra framtíðarsýn sem styðji við fjölbreytt og öflugt tómstundastarf í bænum. Sérstaklega er lögð áhersla á jöfn tækifæri, samvinnu, faglega þróun og aukna þátttöku íbúa, sem talin eru lykilatriði í að efla velferð og vellíðan í samfélaginu.

Menntaráð leggur áherslu á að tómstundastefnan verði innleidd með markvissum hætti og hlakkar til að fylgjast með þróun og framvindu verkefna á næstu árum. Ráðið fól formanni sínum að koma á framfæri þeim athugasemdum og ábendingum sem fram komu á fundinum til frekari úrvinnslu.

Tómstundastefna Reykjanesbæjar er nú til umsagnar hjá fleiri ráðum og verður unnið að því að samþykkja endanlega útgáfu hennar á næstunni.

Á fundi Lýðheilsuráðs 16. júní kom fram að ráðið hafði yfirfarið tómstundastefnu Reykjanesbæjar 2025–2028 og fagnar þeirri framtíðarsýn og markmiðum sem þar koma fram. Ráðið lítur svo á að stefnan stuðli að aukinni þátttöku, virkni og vellíðan íbúa, sérstaklega barna og ungmenna, sem hefur jákvæð áhrif á lýðheilsu.

Lýðheilsuráð óskar þeim sem unnu að gerð stefnunnar til hamingju með vandaða og metnaðarfulla vinnu og felur formanni ráðsins að koma athugasemdum ráðsins áfram.