Meistaraflokkur kvenna nýtir sektarsjóðinn sinn í gott málefni
-hvetur karlaliðið til að gera slíkt hið sama
Meistaraflokkur kvenna í Grindavík hefur ákveðið að nota sektarsjóðinn sinn til þess að styðja við Petru Rós Ólafsdóttur fyrrum liðsfélaga í Reykjavíkurmaraþoninu á laugardaginn.
Petra Rós hleypur með hópi ættingja og vina fyrir FAAS, félag áhugafólks og aðstandenda Alzheimerssjúklinga og annarra skyldra sjúkdóma. Hvetur meistaraflokkur sem flesta til þess að heita á hana og hlaupahópinn „Stingum af" og skora um leið á önnur lið að fylgja þeirra fordæmi, sérstaklega karlaliðið í Grindavík.
„Við erum mjög þakklátar fyrir að hafa Petru Rós í kvennaráði Grindavíkur, hún stendur eins og klettur við bakið á liðinu, alltaf tilbúin að rétta hjálparhönd og er ein af ástæðum þess að meistaraflokkur kvenna er enn starfræktur í Grindavík."
