Margrét gefur kost á sér í 1. sæti Sjálfstæðisflokks í Reykjanesbæ

Margrét Sanders hefur gefið kost á sér í 1. sæti á framboðslista Sjálfstæðisflokks í Reykjanesbæ fyrir komandi sveitarstjórnarkosningar. Á fundi fulltrúaráðs sjálfstæðisfélaganna í Reykjanesbæ í gærkvöldi var ákveðið að viðhafa uppstillingu og tilkynnti Margrét Sanders þá að hún gæfi kost á sér í 1. sæti á lista.

 

Uppstillingarnefnd verður kosin á fulltrúaráðsfundi þann 1. febrúar nk. og mun hún í framhaldinu óska eftir framboðum á listann.

 

Þegar hafa komið fram nokkrir einstaklingar og lýst áhuga á að taka sæti ofarlega á lista Sjálfstæðisflokksins en Margrét Sanders er sú fyrsta til að lýsa yfir áhuga á að taka forystusætið. Margrét er ráðgjafi og meðeigandi ráðgjafafyrirtækisins Strategíu. Hún er auk þess formaður Samtaka verslunar og þjónustu síðan 2014, og hefur setið í stjórn og framkvæmdastjórn Samtaka atvinnulífsins frá sama tíma.

 

Margrét starfaði sem framkvæmdastjóri hjá Deloitte á Íslandi í 17 ár eftir að hún kom heim frá háskólanámi í viðskiptafræði og MBA í Bandaríkunum. Margrét lauk íþróttakennaraprófi og kennaraháskólaprófi frá Kennaraháskóla Íslands og Íþróttakennaraskóla Íslands og starfaði sem kennari og íþróttakennari í 15 ár. Auk þessa stundaði Margrét nám í frönsku við Háskóla í Frakklandi.

 

Margrét hefur í gegnum árin starfað mikið að félagsmálum og verið m.a. í stjórnum íþróttafélaga í Njarðvík og Keflavík ásamt því að keppa í nokkrum íþróttagreinum og sem þjálfari í Njarðvík. Hún hefur setið í stjórnum ýmissa fyrirtækja en einnig í nefndum á vegum ríkis og sveitarfélaga meðal annars í nefnd um fasteignir, nýbyggingar og aðstöðu heilbrigðisstofnana, nefnd vegna flutnings grunnskóla til sveitarfélaganna og stjórn Heilbrigðisstofnunar Suðurnesja. 

 

Margrét er gift Sigurði Guðnasyni og eiga þau 2 börn, þau Sigríði og Albert Karl sem lést 2011. Fósturdóttir Margrétar og dóttir Sigurðar er Sylvía Rós.

 

 Á fundi fulltrúaráðs sjálfstæðisfélaganna í Reykjanesbæ í gærkvöldi var ákveðið að viðhafa uppstillingu.