Mánaðarverkfall myndi spara sveitarfélögum 60 milljónir

Sveitarfélögin á Suðurnesjum munu spara 60 milljónir króna í launakostnað ef verkfall kennara endist í mánuð.

Þar sem verkfallið virðist ekki ætla að leysast á næstunni og samningaviðræður hafa engan árangur borið er ekki laust við að einhverjir leiði hugann að því hvað sveitarfélög spari í launakostnað á meðan verkfalli stendur.

Meðallaun grunnskólakennara eru um 250.000 krónur og 240 kennarar eru í verkfalli á Suðurnesjum. Þannig má glöggt sjá að ef verkfallið stendur í heilan mánuð, eins og fleygt hefur verið í umræðunni, verður sparnaður sveitarfélaganna heilar 60 milljónir.

Það er dágóð upphæð og má nefna sem dæmi að þessi upphæð myndi borga fyrir rúmlega 1 km af tvöföldun Reykjanesbrautar.