Makrílmok við Keflavíkurhöfn: með 600 fiska í skottinu

Hafnargarðarnir í Keflavíkurhöfn hafa verið þéttskipaðir af veiðimönnum síðustu daga. Í gær skiptu veiðimennirnir tugum og veiðin var ævintýraleg. Margir eru með 3-5 króka á línunni og fá fisk á alla króna um leið og kastað er út.

Fjölmarga mátti sjá með stórar fötur eða bala fulla af makríl. Aðrir eru stórtækari og heyrðu Víkurfréttir af einum veiðimanni í gær sem var með 600 fiska í skottinu á bílnum sínum.

Það var að heyra á mörgum veiðimönnum að makríllinn yrði verkaður í frost og jafnvel bara beint á grillið með salti og pipar.

Aðrir grétu það sárlega að ekki væri hægt að koma makríl í reyk hér Suður með sjó. Það er kannski viðskiptatækifæri fyrir útsjónarsama menn að koma upp reykaðstöðu yfir helsta makrílveiðitímann.

Meðfylgjandi myndir voru teknar við Keflavíkurhöfn í gær.

Hér er búið að hausa makríl í stóran bala.

Veiðimenn voru um alla bryggju. Hafrannsóknarskipið Dröfn kom í höfnina en hafði lítil áhrif á veiðarnar.

Eins og sjá má var hafnargarðurinn þétt skipaður veiðimönnum af öllum stærðum og báðum kynjum.

Víkurfréttamyndir: Hilmar Bragi Bárðarson