Maður blóðrisa á hálsi: þrír menn réðust á hann

Mjög rólegt var að gera hjá Lögreglunni í Keflavík sl. föstudag en á laugardag var tveimur bifreiðum stolið í Keflavík og telur lögreglan að sami aðili hafi verið að verki í báðum tilvikum. Á sunnudagsmorgun kom maður á lögreglustöðina í Keflavík og var hann blóðrisa á hálsi. Maðurinn sagði að þrír bandaríkjamenn hefðu ráðist á sig á skemmtistaðnum Strikinu. Föstudagurinn 31. janúar

Tíðindalaust og mjög rólegt hjá lögreglu

Laugardagurinn 1. febrúar

Kl. 09:31 var tilkynnt um stuld bifreiðar við Þverholt í Keflavík. Bifreiðin fannst síðan eftir ábendingu á göngustíg austan við Langholt í Keflavík kl. 14:32. Nokkrar skemmdir voru á bifreiðinni.

Kl. 10:18 var tilkynnt um að fólksbifreið væri staðsett utanvegar austan við Óðinsvelli. Við athugun kom í ljós að bifreiðinni hafði verið stolið þá um nóttina frá Vatnsholti. Töluverðar skemmdir voru á bifreiðinni.

Ætla má að sami aðili hafi þarna verið að verki. Vill lögreglan ítreka benda til eigenda bifreiða að læsa bifreiðum sínum og alls ekki að skilja lykla bifreiðanna inni í þeim.


Sunnudagurinn 2. febrúar

Kl. 04:23 barst lögreglunni tilkynning um að maður hafi slegið með krepptum hnefa í gegnum rúðu í verslun í Grindavík og slasast á hendi. Í ljós kom að maðurinn hafði hlotið minniháttar áverka á hendi.

Nokkuð var um pústra, utan við og inni á dansstöðum seinnipart nætur, en ekkert alvarlegt.

kl. 06:50 Maður kom á lögreglustöðina í Keflavík blóðrisa á hálsi. Hann kvað þrjá bandaríkjamenn hafa ráðist á sig inni á Strikinu (Casino) skömmu áður. Hann kvaðst ekki þekkja menn þessa né hafa á þeim nákvæma lýsingu, en þeir hafi verið ljósir á hörund.

Kl. 22:14 var tilkynnt til lögreglunnar að brotist hafi verið inn í bifreið sem hafði verið skilin eftir við gömlu Sundhöllina við Framnesveg í Keflavík. Brotin var rúða í afturhurð og úr bifreiðinni tekin Playstation leikjatölva ásamt aukahlutum og 8 leikjum. Þá var tekin framhlið af útvarpi með geislaspilara og geisladiskataska með diskum og ferðaspilara. Lögrglan í Keflavík lýsir eftir sjónarvottum.

Mánudagurinn 3. febrúar

Nokkrir bílaeigendur voru boðaðir í skoðun með bifreiðar sínar, vegna vanrækslu á að færa þær til aðalskoðunar.

Lögreglan skorar á bifreiðaeigendur að trassa ekki að færa bifreiðar sínar til skoðunar þar sem há sekt kemur til ef lögreglan hefur afskipti af óskoðuðum bifreiðum.