Lýðheilsuráð óskar eftir upplýsingum frá íþróttafélögum um áfengissölu

Lýðheilsuráð Reykjanesbæjar mun óska eftir upplýsingum frá íþróttafélögum bæjarins um hvort áfengi sé selt á íþróttaviðburðum og hvaða reglur gildi þá um slíka starfsemi.

Málið var tekið fyrir á fundi ráðsins 15. maí, eftir að ályktun barst frá Félagi íþrótta-, æskulýðs- og tómstundafulltrúa (FÍÆT) þar sem lýst var áhyggjum af sölu áfengis í tengslum við íþróttaviðburði.

Lýðheilsuráð leggur áherslu á að skipulagning viðburða taki mið af öryggi, forvörnum og vellíðan allra þátttakenda og gesta, og telur mikilvægt að skýr viðmið og verklagsreglur séu til staðar þar sem áfengissala kemur við sögu.