Lögregluembættum fækkað: Suðurnes óbreytt

Ríkisstjórnin hefur samþykkt tillögu Rögnu Árnadóttur dómsmála- og mannréttindaráðherra þess efnis að lögregluumdæmum verði fækkað úr 15 í 6 og að yfirstjórn lögreglu verði skilin frá embættum sýslumanna frá og með 1. janúar 2011. Miðað er við að frumvarp þessa efnis verði lagt fram á Alþingi á morgun að fengnu samþykki stjórnarflokka. Markmiðið með breytingunum er m.a. að mæta lækkuðum fjárveitingum með sparnaði í yfirstjórn og draga sem minnst úr þjónustu. Um leið er komið til móts við ákveðin fagleg sjónarmið. Samkvæmt frumvarpinu mun fyrirkomulag lögreglumála á Suðurnesjum verða óbreytt.

Nái frumvarpið fram að ganga verða fjórir nýir lögreglustjórar utan höfuðborgarsvæðisins og Suðurnesja, þ.e. á Vesturlandi og Vestfjörðum, Norðurlandi, Austurlandi og Suðurlandi. Lögð er að auki til sérstök heimild handa dómsmálaráðherra til að fela sýslumanni daglega lögreglustjórn í umdæmi sínu, í umboði viðkomandi lögreglustjóra. Þannig verði unnt að taka tillit til aðstæðna í einstökum landshlutum. Gert er ráð fyrir að lögregluumdæmin verði nánar ákveðin með reglugerð.

Lagt er upp með að lögreglustjórarnir fjórir komi úr hópi núverandi sýslumanna. Sýslumenn í öðrum embættum verði settir yfir þau sýslumannsembætti sem þannig losna. Því mun sýslumannsembættum fækka sem nemur þessum fjórum embættum. Í þessum áfanga er ekki ráðgert að fækka sýslumannsembættum frekar heldur verður unnið áfram að tillögum þess efnis.

Mynd: Sigríður Björk Guðjónsdóttir, lögreglustjóri á Suðurnesjum. Hún mun sitja áfram í óbreyttu embætti samkvæmt frumvarpi Rögnu Árnadóttur dómsmála- og mannréttindaráðherra. Víkurfréttamynd: Ellert Grétarsson