Lögreglubifreið hafnaði á ljósastaur

Lögreglubifreið hafnaði á ljósastaur á Reykjanesbraut við Flugstöð Leifs Eiríkssonar nú síðdegis. Einn lögreglumaður var fluttur á sjúkrahús en hann mun ekki vera alvarlega slasaður. 
 
Tveir lögreglumenn voru í lögreglubílnum, sem er ónýtur eftir áreksturinn. 
 
Samkvæmt heimildum Víkurfrétta höfðu lögreglumenn mælt bifreið fyrir of hraðan akstur og voru að veita henni eftirför þegar lögreglubifreiðin varð stjórnlaus í hálku og krapa á vegöxlinni. Málið er til rannsóknar og litlar upplýsingar að hafa hjá lögreglunni á Suðurnesjum á þessari stundu.
 
Mikill viðbúnaður var á vettvangi en þar var fjölmennt lið frá bæði lögreglu og slökkviliði. 
 
Víkurfréttamynd: Hilmar Bragi Bárðarson