LÖGGUFRÉTTIR
Tilgangslaus eyðilegging Skemmdarvargar fóru mikinn í Reykjanesbæ í vikunni sem leið og ollu eignatjóni víðs vegar á svæðinu. Skemmdarhrinan hófst um miðjan dag fyrir viku síðan er einhverjir hugrakkir einstaklingar réðust á mannlausa bíla og vinnuvélar á athafnasvæði Ellerts Skúlasonar við Sjávargötuna í Njarðvík. Brutu hetjurnar rúður og ljós. Aðfararnótt laugardagsins var bifreið stórskemmd þar sem hún hafði verið skilin eftir á Vogastapa á Reykjanesbraut. Rúður voru brotnar, bifreiðin dælduð og rótað til í bifreiðinni. Á sunnudag var tilkynnt um innbrot í 3 númerslausar bifreiðar á Iðavöllum og var ein þeirra skemmd lítillega. Á mánudag var jarðýta við Heiðarskóla skemmd, rúða brotin og útvarp og heyrnarskjól tekið ófrjálsri hendi. Þá voru einnig skemmdar 3 bifreiðar á Sólvallargötu, bílarnir rispaðir og dældaðir þannig að mikið tjón hlaust af. Þjófnaðaralda í Vallahverfinu Beverly Hills hverfi okkar Reykjanesbæjarbúa, Vallahverfið, varð fyrir árás þjófóttra síðastliðinn miðvikudag. Við Ránarvelli var farið inn í 2 bifreiðar og það stolið geislaspilurum, sólgleraugum og hleðslutæki fyrir GSM síma. Á Óðinsvöllum var einnig farið inn í tvær bifreiðar og 2 radarvörum stolið ásamt seðlaveski og á Bragavöllum varð einn bifreiðaeigandi fyrir innbroti. Engu var stolið úr bifreiðinni en þjófurinn gerði sér lítið fyrir og fór inn í hús og stal þaðan myndavél. Það vakti athygli lögreglu að í flestum þessum þjófnuðum voru bifreiðarnar ólæstar.
