Lögfræðingur mælir gegn brjóstabanni

Bæjarstjórn Sandgerðis samþykkti á fundi sínum á dögunum þá viðmiðunarreglu að í Sundmiðstöð Sandgerðis skuli sundgestir að lágmarki klæðast sundskýlu eða sundbuxum. Reglan á við bæði um konur og karla. Frístunda,- forvarna- og jafnréttisráð bæjarins lagði tillöguna fram. Áður voru ekki til skráðar reglur um sundfatnað gesta í sundlauginni.

 

Klæðaburður sundlaugargesta í sundlaugum Reykjanesbæjar var jafnframt til umfjöllunar í íþrótta- og tómstundaráði Reykjanesbæjar á dögunum. Ráðið óskaði eftir áliti óháðs lögmanns til að fjalla um tvær lykilspurningar;

 

1. Eru í gildi reglur, skráðar eða óskráðar, sem banna konum að fara berbrjósta í sundlaugar Reykjanesbæjar?

 

2. Er leyfilegt að setja slíkar reglur?

 

Álit lögmannsins er nokkuð ítarlegt en í niðurlagi álitsins mælir hann gegn því að settar verði reglur sem banni konum að fara berbrjósta í sund í sundlaugum Reykjanesbæjar. Íþrótta- og tómstundaráð tekur undir þau orð í fundargerð sinni og lagði til við bæjarstjórn að ekki verði farið gegn áliti lögmannsins.