Ljúka umfangsmiklum fráveituframkvæmdum
– í Sandgerði á kjörtímabilinu
Bæjarstjórn Sandgerðis hefur samþykkt að ráðast í 2. áfanga fráveitu við Sjávarbraut í Sandgerði. Áfanginn felst í því að ganga frá fráveitulögn undir Sjávarbrautinni. Fyrsta áfanga verksins lauk 2010 en í honum fólst að ganga frá lögnum á hafnarsvæðinu og koma því í viðundandi ástand.
„Það hefur verið lengi til umræðu hér í Sandgerði að það þurfi að koma fráveitumálum í viðunandi ástand hjá bæjarfélaginu,“ segir Ólafur Þór Ólafsson, forseti bæjarstjórnar Sandgerðis í samtali við Víkurfréttir.
„Stóra fréttin í þeirri framkvæmd er að þar með erum við að hreinsa upp fjöruna sem er suður af hafnarsvæðinu sem er sérstaklega merkilegt út af fuglalífinu sem þar er. Í dag ganga þarna út nokkrar gamlar frárennslislagnir en þeim verður öllum lokað og frárennslinu komið í eina lögn sem tengist síðan aðal fráveitulögninni,“ segir Ólafur Þór.
Markmið bæjarstjórnar Sandgerðis að ljúka við þriðja og síðasta áfangann í þessum frárennslismálum áður en þessu kjörtímabili lýkur, en í þeim áfanga felst að byggja upp nýja frárennslislögn út í sjó sem gengur þá nógu langt út til að frárennslið fari út í straum. Að þeirri framkvæmd lokinni þá ættu frárennslismál í Sandgerði að vera komin í gott stand til framtíðar.
