Lions gaf alþjóðasveitinni rafstöðvar

Í gær komu fulltrúar Lionshreyfingarinnar á Íslandi færandi hendi til Slysavarnafélagsins Landsbjargar. Hreyfingin ákvað að gefa 1.000.000,- kr. til kaupa á tveimur rafstöðvum fyrir Íslensku alþjóðabjörgunarsveitina en slíkar rafstöðvar eru meðal þess búnaðar sveitarinnar sem skilinn var eftir á Haiti þegar sveitin fór til hjálparstarfa þar. Þessi höfðinglega gjöf kemur úr hjálparsjóði Lions hreyfingarinnar á Íslandi og er þetta sameiginlegt verkefni 93 Lionsklúbba landsins. Þess má geta að Lions hreyfingin á heimsvísu hefur verið afar öflug í stuðningi sínum við hjálparstarf á Haiti.

Við þetta tækifæri sagði Gísli Rafn að afar mikilvægt væri að koma sveitinni sem fyrst í útkallshæft form og að stuðningur og velvilji sem þessi skipti þar miklu máli. Einnig ræddi hann um það uppbygginarstarf sem framundan er á Haiti og mun standa yfir næstu árin. Sagði hann að alþjóðleg félagasamtök, á borð við Lions hreyfinguna, spiluðu þar stórt hlutverk, ekki síst með því að styðja vel við bakið á sínu félagsfólki á hamfarasvæðinu en á Haiti er starfandi Lions klúbbur með um 80 meðlimum.

Gísli Rafn Ólafsson, einn af stjórnendum Íslensku alþjóðabjörgunarsveitarinnar, tók við gjöfinni frá þeim Guðmundi Oddgeirssyni og Kristni Hannessyni, umdæmisstjórum Lions á Íslandi og Guðrúnu Yngvadóttur, fjölumdæmisstjóra. Myndin er tekin við það tilefni.