Líkur á kvikuhlaupi og eldgosi fari að aukast nær mánaðamótum

Aflögunargögn sýna að landris og kvikusöfnun undir Svartsengi heldur áfram. Ef kvikusöfnun heldur áfram á svipuðum hraða munu 12 milljón rúmmetrar af kviku hafa safnast undir Svartsengi í lok janúar eða byrjun febrúar. Þá er talið, skv. líkanreikningum, að líkurnar á kvikuhlaupi og eldgosi fari að aukast, segir í tilkynningu frá Veðurstofu Íslands.

Líkönin byggja á áætluðu kvikuinnflæði á hverjum tíma en litlar breytingar á því innflæði geta haft áhrif á matið á mögulegum tímasetningum næsta eldgoss.

Eins og síðustu vikur hefur verið lítil jarðskjálftavirkni í kringum Svartsengi. Hættumat Veðurstofunnar hefur verið uppfært og hafa engar breytingar verið gerðar. Það gildir til 28. janúar, að öllu óbreyttu.