Leit hafin á ný

Leit hófst á ný í morgun af manninum sem féll niður í sprungu á miðvikudaginn en leit hafði verið hætt í gærkvöldi vegna ótryggra aðstæðna á vettvangi.

Mikið hefur rignt undanfarna daga og það hefur gert björgunarfólki erfitt fyrir og þess vegna var ákvörðun tekin í gærkvöldi um að fresta leit en hún hófst strax í morgun. Blíða er í Grindavík í dag og því ekkert til fyrirstöðu að halda leit áfram af fullum krafti. 

„Við ákváðum að stöðva leitina á tólfta tímanum í gærkvöldi því talsvert grjóthrun hafði verið og við töldum okkur ekki geta tryggt öryggi leitarfólks. Það er ekki gott að segja til um hvernig leitin gangi, við erum bara í ákveðnu aðgerðum þarna niðri og aðstæður eru erfiðar en leit hefur samt sem áður gengið vel miðað við aðstæður. Við ætlum okkur að finna þennan mann,“ sagði Úlfar.