Laus úr öndunarvél

Einum er enn haldið á gjörgæslu eftir umferðarslysið á Reykjanesbraut í síðustu viku en hann hefur verið tekinn úr öndunarvél og að sögn vakthafandi læknis gjörgæsludeildar styttist í að hann verði útskrifaður af deildinni. Líðan fólksins sem slasaðist í bílslysinu fer batnandi.

Sex voru fluttir á slysadeild Landspítala, þar af þrír á gjörgæslu, eftir slysið, sem varð skammt frá Vogaafleggjara.

Slys hafa verið mjög tíð á kaflanum við Voga. Vegagerðin hefur nú bætt merkingar á þeim slóðum.

VF-mynd/Hilmar