Kríuungarnir keyrðir í klessu

Kríuvarpið við Norðurkot í Sandgerði er að takast með miklum glæsibrag þetta sumarið. Aldrei áður hefur sést eins mikið af  kríu á svæðinu og mikið af ungum eru nú að taka fyrstu skrefin út í lífið. Þessi skref geta hins vegar verið banvæn eins og Sigríður H Sigurðardóttir, húsfreyja í Norðurkoti bendir á. Ungarnir sækja upp á heitt malbikið og þar verða þeir óvarkárum ökumönnum að bráð.

Í vikunni fóru fyrstu ungarnir á stjá og út á þjóðveginn sem liggur á milli Sandgerðis og Stafness. Ökumenn sem fara um svæðið huga margir hverjir ekki að ungunum og hreinlega keyra þá í klessu. Margir ungar hlutu þessi örlög strax fyrsta sólarhringinn og af gamalli reynslu þá eiga margir eftir að enda lífið með þessum hætti á næstu dögum.

Sigríður segir að kríuvarpið sé að heppnast núna í fyrsta skipti í fjögur ár. Engir ungar hafi komist á legg síðustu ár þar sem fæðubrestur hafi verið í hafinu og ekkert hentugt síli fyrir ungana.

„Það er leiðinlegt að horfa upp á ungana keyrða svona niður loksins þegar varpið er að takast,“ sagði Sigríður sem hvetur ökumenn til að taka lífinu rólega á þessum 700 metra kafla þar sem ungarnir sækja upp á veginn. Það þurfi að sýna ungunum tillitsemi og keyra rólega um svæðið og njóta þess að fylgjast með krúttlegum ungunum.

Bárður Sindri bjargaði þessum af veginum og kom honum út í móa, þar sem unginn á að vera öruggari.