Kristján Gunnarsson nýr stjórnarformaður SpKef

Kristján Gunnarsson var kjörinn formaður stjórnar Sparisjóðsins í Keflavík eftir aðalfund sjóðsins í Kirkjulundi nú síðdegis.
Auk Kristjáns voru kjörnir í stjórn þeir Garðar Ketill Vilhjálmsson sem jafnframt var kjörin varaformaður á fyrsta fundi stjórnarinnar eftir aðalfundinn. Aðrir í stjórn eru Margrét Ágústsdóttir sem er úr Keflavík eins og Kristján og Garðar, Heimir Ágústsson og Björgvin Sigurjónsson en þeir tveir síðastnefndu koma frá öðrum sparisjóðum sem sameinuðust SpKef. Í varastjórn voru kosnir Kristinn Jónasson, Guðbrandur Einarsson, Óskar Elísson og Ásdís Ýr Jakobsdóttir.
Aðalfundinum lauk á áttunda tímanum í kvöld eftir miklar umræður. „Þetta er erfiðasti aðalfundur sem ég hef setið og erfiðasta rekstrarár að baki. Ég er samt ánægður með stuðninginn sem ég og við fengum hjá stofnfjáraðilum á aðalfundinum,“ sagði Geirmundur Kristinsson, sparisjóðsstjóri sem tilkynnti að hann myndi ljúka störfum á árinu. Í ræðu Geirmundar kemur fram af hverju hann kýs að segja upp störfum en í stuttu máli sagt er ástæðan sú að hann er of hátt launaður að mati ríkisvaldsins sem vill ekki hafa hálaunaða sparisjóðsstjóra í vinnu. Meira um það í næstu grein hér á vf.is þar sem birt er orðrétt ræða Geirmundar á fundinum í kvöld. Eins og fram kom á vf.is fyrr í dag þá var Angantýr Jónasson ráðinn Sparisjóðsstjóri frá 1. júní til áramóta.

Síðar á fundinum komu spurningar frá fundarmönnum og þar var m.a. spurt um helstu stjórnendur sem keyptu stofnbréf í SpKef en fengu kúlulán í annarri bankastofnun fyrir hluta kaupverðs. Geirmundur svaraði því til að hann sæi ekkert athugavert við þau viðskipti. SpKef hefði ekki lánað þeim né tapað á þeim viðskiptum og hann vissi ekki betur en að þeir stæðu uppréttir ennþá. „Umræða um þá var alls ekki sanngjörn og átti engan veginn rétt á sér,“ sagði sparisjóðsstjóri í svari sínu sem jafnframt sagði umræðuna um fyrirtækið Suðurnesjamenn á villigötum.

Meðal þeirra sem tóku til máls voru Páll Jónsson fyrrverandi Sparisjóðsstjóri en hann þakkaði þann heiður sem fundurinn sýndi Tómasi Tómassyni, fyrrverandi Sparisjóðsstjóra sem lést í mars á síðasta ári. Páll sagðist ekki vilja heyra á það minnst að Geirmundur væri að hætta og bað hann í lengstu lög ásamst gömlum stjórnendum SpKef að klára árið. Sparisjóðurinn þyrfti á þeim að halda. Páll koma víða við í ræðu sinni og var mikið niðri fyrir. Hann sagði þó að mestu skipti að Spkef stæði enn í lappirnar og ekki væri að sjá annað en að sjóðurinn myndi standa óveðrið af sér.

Mikið fjölmenni sótti fundinn eða um 300 manns. Á efstu myndinni má sjá nýkjörinn stjórnarformann, Kristján Gunnarsson með þeim Grétari Grétarssyni, starfsmanni SpKef og Garðari Garðarssyni, lögfræðingi og fundarstjóra.