Konur í meirihluta í nýja framboðinu í Reykjanesbæ

„Sérstök uppstillingarnefnd mun leggja fram drög  að lista þegar þar að kemur, en nú þegar er til staðar öflugur hópur sem er tilbúinn til að taka þátt í þessu verkefni og þar eru konur í meirihluta, segir Guðbrandur Einarsson, fyrrverandi bæjarfulltrúi í Reykjanesbæ en hann er í hópi fólks sem vinnur að undirbúningi nýs framboðs fyrir kosningarnar í vor.

„Þetta framboð er að verða til vegna ákveðinnar undiröldu í bæjarfélaginu okkar. Það eru greinilega margir sem vilja að valkostirnir verði fleiri þegar þeir ganga að kjörborðinu í vor,“ segir Guðbrandur sem á að baki átta ár í bæjarstjórn Reykjanesbæjar fyrir Samfylkinguna og A-listann sem var framboð félagshyggjuflokkanna á næst síðasta kjörtímabili.

Í skoðanakönnun síðastliðið haust kom fram stuðningur við Pírata og Bjarta Framtíð án þess að þessi framboð væru til staðar í Reykjanesbæ. Einhver hreyfing var í kringum Pírata við stofnun félags nýlega en frekari fréttir af því hafa ekki borist.