Komu í veg fyrir ofþornun landsliðsþjálfarans

Starfsmenn ISAVIA hafa síðustu klukkustundir liðsinnt þúsundum flugfarþega sem eru strandaglópar á Keflavíkurflugvelli eftir að verkfall brast á í morgun hjá flugvirkjum Icelandair. Meðal þess sem starfsmenn flugvallarnis hafa gert er að dreifa vatni á meðal farþeganna til að koma í veg fyrir ofþornun þar sem fólkið stendur tímunum saman í röð í brottfararsal flugstöðvarinnar.

 

Heimir Hallgrímsson, landsliðsþjálfari Íslands í knattspyrnu, er meðal þeirra sem fengu vatnsflösku frá bráðaliðum flugvallarslökkviliðsins. Heimir er í röðinni og bíður þess að fá breytingu á ferðatilhögun sinni. Bráðaliði sem Víkurfréttir ræddu við sagði alltaf hættu á ofþornun þar sem fólk stendur lengi í aðstæðum eins og þeim sem mynduðust í flugstöðinni í morgun.

 

Röðin, sem hlykkjast um allan brottfararsal Flugstöðvar Leifs Eiríkssonar, virðist ganga hægt. Ástæðan er að afgreiðsla og breytingar á ferðatilhögun tekur langan tíma fyrir hvern og einn farþega.

 

Myndirnar með fréttinni voru teknar í hádeginu í dag. VF-myndir: Hilmar Bragi