Kom að óboðnum gesti í baði
– hafði innbyrt vímuefni og var ruglaður í ríminu.
Íbúa í umdæmi lögreglunnar á Suðurnesjum brá heldur en ekki í brún þegar hann kom heim til sín í vikunni. Í íbúð hans var þá staddur ókunnugur maður og það sem meira var,- hann var í baði. Íbúinn hafði skilið íbúð sína eftir opna og mannlausa og því fór sem fór.
Hinn óvænti gestur reyndist hafa ruglast á íbúðum í viðkomandi fjölbýlishúsi auk þess sem hann hafði innbyrt vímuefni og var þar af leiðandi ruglaður í ríminu. Var tekin ákvörðun um að flytja hann á Heilbrigðisstofnun Suðurnesja til rannsóknar.
