Kastaðist af torfæruhjóli

Lögreglunni á Suðurnesjum barst um miðjan dag í fyrradag tilkynning þess efnis að piltur hefði kastast af mótorhjóli og slasast. Óhappið átti sér stað á Sandgerðisvegi. Um var að ræða sextán ára pilt sem var á ferð ásamt félaga sínum og óku þeir torfæruhjólum á miklum hraða, að sögn sjónarvotta. Annað hjólið tókst á loft, kollsteyptist, fór nokkra hringi og pilturinn flaug af því. Hann var fluttur með sjúkrabifreið á Heilbrigðisstofnun Suðurnesja til aðhlynningar og reyndist hann vera lærbrotinn.  Sendibifreið var fengin til að fjarlægja hjólið af vettvangi. Málið er í rannsókn.