Karen og Ný-ung fá Súluna

Karen Sturlaugsson, aðstoðartónlistarskólastjóri í Tónlistarskóla Reykjanesbæjar og verslunin Ný-ung, hlutu menningarverðlaun Reykjanesbæjar, Súluna, fyrir árið 2001. Verðlaunin verða afhent við hátíðlega athöfn í Kjarna 8. nóvember nk.
Karen stjórnar lúðrasveit skólans sem vann einmitt til verðlauna á móti skólalúðrasveita sem haldið var í Reykjanesbæ í sumar. Það vakti talsverða athygli nú í haust þegar eigendur Ný-ungar keyptu verkið Flug eftir Erling Jónsson og settu það upp fyrir framan verslunina við Hafnargötu í Keflavík.
Menningar- og safnaráð úthlutar þessum verðlaunum ár hvert en meðal þeirra sem hlotið hafa verðlaunin eru Rúnar Júlíusson tónlistarmaður, Kjartan Már Kjartansson fyrrv. tónlistarskólastjóri, Hitaveita Suðurnesja og Sparisjóðurinn.