Já - Sameining Sandgerðis og Garðs samþykkt í íbúakosningu

Íbúar í Sandgerðisbæ og Sveitarfélaginu Garði samþykktu sameiningu sveitarfélaganna tveggja í íbúakosningu sem fram fór í dag en niðurstöður kosninganna voru kynntar á tólfta tímanum í kvöld í beinni útsendingu á fésbókarsíðu Víkurfrétta.

Í Garði samþykktu 71,5% íbúa sameininguna en 28,5% voru á móti. Á kjörskrá voru 1.134 og kusu 601 eða 53% þeirra sem voru á kjörskrá.

Í Sandgerði var sameiningin samþykkt með 55,2% atkvæða en 44,8% voru á móti. Á kjörskrá voru 1.200 manns og kusu 662 eða 55,2%. Þrír seðlar voru auðir og einn ógildur.

„Þá er það staðfest að nýtt og öflugt sveitarfélag á Suðurnesjum er að verða til. Það eru spennandi tímar framundan,“ sagði Ólafur Þór Ólafsson, formaður bæjarstjórnar í Sandgerði, þegar úrslitin voru kynnt.

Níu manna bæjarstjórn verður kosin í maí 2018 og í framhaldinu tekur hið nýja sveitarfélag til starfa. Íbúar fá þá að kjósa um nafn á nýju sveitarfélagi.

Jöfnunarsjóður sveitarfélaga veitir nýja sveitarfélaginu 100 milljóna króna framlag til endurskipulagningar stjórnsýslu og þjónustu og 294 milljóna króna framlag til skuldajöfnunar. Einn bæjarstjóri verður fyrir sameinað sveitarfélag.