Isavia og NIB undirrita lánasamning vegna framkvæmda á Keflavíkurflugvelli

Isavia ohf. og Norræni fjárfestingarbankann (NIB) undirrituðu í dag samning um lán til tíu ára að fjárhæð 50 milljóna evra, eða sem nemur jafnvirði um 7,5 milljörðum íslenskra króna, vegna framkvæmda á Keflavíkurflugvelli, sér í lagi við austurálmu flugstöðvarinnar.

Nýja byggingin mun bæta 23 þúsund fermetrum við núverandi flugstöð og þannig stækka hana um 30%. Gert er ráð fyrir að framkvæmdin fái framúrskarandi einkunn á grundvelli BREEAM-vottunarkerfisins. Hún verði að hluta tekin í notkun fyrir lok árs 2023 og verði að fullu lokið árið 2024.

Sveinbjörn Indriðason, forstjóri Isavia, segir að félagið hafi sett sér metnaðarfull en um leið afmörkuð og skýr markmið í umhverfismálum og fylgi ítarlegri aðgerðaráætlun til að koma sjálfbærnistefnu Isavia í framkvæmd. „Uppbyggingin er vottuð með BREEAM sem er óháð vottun sem tryggir mikilvægt aðhald og að sjálfbærni verði höfð að leiðarljósi í framkvæmdunum. Stefnt er að því að minnka kolefnisspor framkvæmda, minnka vatns- og rafmagnsnotkun og viðhalda grænum svæðum og líffræðilegum fjölbreytileika í hönnun og framkvæmd.“

Sveinbjörn segir verkefnin mörg sem fram undan séu í framkvæmdunum og því mikilvægt að fá NIB að borðinu. „Við erum að bæta við flugstöðvarbygginguna og framkvæma á akstursbrautum  – allt til að bæta þjónustuna við notendur Keflavíkurflugvallar.“

André Küüsvek, forstjóri og stjórnarformaður NIB, segir að lánasamningurinn við Isavia sýni fram á mikilvægi langtíma fjárfestingar í fluggeiranum til að styðja við efnahagsvöxt og flugtengingar. „Keflavíkurflugvöllur er mikilvæg tengistöð fyrir ferðaþjónustu á Íslandi og þess er vænst að hún leiki mikilvægt hlutverk í efnahag landsins,” segir Küüsvek.

Norræni fjárfestingarbankinn er alþjóðleg fjármálastofnun í eigu aðildarlandanna átta: Danmerkur, Eistlands, Finnlands, Íslands, Lettlands, Litáens, Noregs og Svíþjóðar. Bankinn lánar til opinberra verkefna og einkaverkefna jafnt innan sem utan aðildarríkjanna.