Iceland Express frá Standsted til Gatwick

Iceland Express hefur skipt um flugvöll í London og fór fyrsta vélin frá Keflavík til Gatwick í morgun en félagið hefur undanfarin ár flogið til Standsted flugvallar. „Það er styttra í miðborgina og fleiri möguleikar á tengiflugi,“ sagði Matthías Imsland, forstjóri Iceland Express rétt fyrir brottför í Leifsstöð í morgun. Með honum klipptu á borða við þetta tækifæri Kristján Möller, samgönguráðherra, Björn Óli Hauksson, flugvallarstjóri og sendiherra Breta á Íslandi, Ian Whitting.

Matthías segir að tímasetningin á þessum breytingum sé einkar hagstæð en mikil aukning hafi verið í bókunum breskra ferðamanna til Íslands og það megi rekja að hluta til Gatwick en Bretar vita það líka að þeir fá talsvert meira fyrir pundin sín í dag en áður. Guðný María Jóhannsdóttir, framkvæmdastjóri viðskiptasviðs Keflavíkurflugvallar ohf. sagði að veik króna hjálpaði til í þessum málum því nú væri ódýrara fyrir útlendinga að koma til Íslands.
Iceland Express verður með aðstöðu á South terminal á Gatwick sem er staðsettur rétt sunnan við London. Flugfélög á borð við EasyJet, British Airways og US Airways fljúga þaðan. Möguleikar farþega félagsins aukast því enn á fjölbreyttu tengiflugi til allra heimshorna.
Iceland Express mun fljúga til London-Gatwick átta sinnum í viku og ferðir til Standsted munu falla niður.

Guðný María Jóhannsdóttir hjá Keflavíkurflugvelli ohf. og Björn Óli Hauksson, flugvallarstjóri afhentu Matthíasi Imsland, forstjóra Iceland Express blóm í tilefni dagsins.