Íbúum Suðurnesja heldur áfram að fjölga

Þjóðskrá birti um síðustu mánaðarmót tölur um íbúafjölda þar sem kemur fram að íbúum Suðurnesja heldur áfram að fjölga. Mest er fjölgunin í Reykjanesbæ en þar hefur íbúum fjölgað um 4,5%, eða 925 manns.

Íbúum fjölgar samtals um 1.108 á Suðurnesjum öllum. Minnst fjölgar í Grindavík, um 1,2%, en Sveitarfélagið Vogar fylgir fast á hæla Reykjanesbæ með 4% íbúafjölgun síðan 1. desember 2021.

Suðurnes skera sig úr með fjölgun upp á 3,8% en næst kemur Suðurland með 2,1% fjölgun. Heildarfjölgun íbúa á landsvísu er 1,7% og standa flestir landshlutar í stað en Norðurland vestra er eini landshlutinn þar sem íbúum fækkar, um 0,6%.