Íbúum brugðið við sprengingu

Íbúum fjölbýlishúss að Heiðartúni 4 í Garði var illa brugðið í gærkvöldi þegar heimatilbúin sprengja (kínverji) sprakk í gangi sameignarinnar. Sprengjunni hafði verið hent inn um glugga og forðuðu sökudólgarnir sér strax af vettvangi.

Mikill hvellur kom af sprengjunni sem glumdi um allt húsið og skaut íbúum skelk í bringu. Myndaðist mikill reykur svo reykskynjarar hússins fóru í gang. Stór brunablettur myndaðist í teppi gangsins.

Lögregla var kölluð til og hefur hún málið til rannsóknar. Íbúar hússins biðja þá sem gætu gefið upplýsingar um málið að snúa sér til lögreglunnar.