Í takti við mikinn meðbyr

„Úrslitin komu skemmtilega á óvart en voru í takt við þann mikla meðbyr sem við höfðum fundið í kosningabaráttunni. Ég taldi góðar líkur á að ég myndi ná kjöri miðað við gengi okkar í skoðanakönnunum en auðvitað er maður alltaf í óvissu þar til atkvæðin eru talin,“ segir Sigurður Helgi Pálmason en hann skipaði annað sætið hjá Flokki fólksins í alþingiskosningunum 2024.

„Á bak við hvert atkvæði er manneskja, manneskja með sína sögu. Frá stofnun Flokks fólksins hefur verið lögð rík áhersla á að eiga raunverulegt samtal við kjósendur. Á síðustu vikum höfum við farið vítt og breitt um kjördæmið og lagt okkur fram um að gefa fólkinu okkar tækifæri að ræða við okkar á samtalsgrundvelli. Því það eru jú þannig samtöl sem bæta skilning okkar um hvað má betur fara í þjóðfélaginu. Við hjá Flokki fólksins erum afar þakklát fyrir það traust sem okkur hefur verið sýnt og við erum staðráðin í að sýna að ég við getum staðið undir því. Samtalinu við fólkið okkar er hvergi lokið og það sýna niðurstöður þessara kosninga.