Hvetur til samstöðu starfsmanna í Straumsvík og allrar verkalýðshreyfingarinnar.

Ályktun stjórnar Verkalýðs- og sjómannafélags Keflavíkur og nágrennis  um kjaradeiluna í Straumsvík.

Kjaradeila stéttarfélaganna í álverinu í Straumsvík við  Rio Tinto Alcan  hefur staðið  á fjórtánda mánuð.  Rio Tinto Alcan hefur komið fram af ótrúlegu virðingarleysi og hroka við starfsmenn í álverinu, vinnumarkaðinn hér á landi og íslensk stjórnvöld.

Framkoma Rio Tinto Alcan við viðsemjendur sína  snýst ekki bara um kaup og kjör í álverinu  heldur er hún aðför að íslenskum vinnumarkaði í heild sinni. Verkalýðshreyfingin á Íslandi verður að bregðast við með samrofa samstöðu með starfsmönnum álversins til að brjóta á bak aftur fyrirætlan fyrirtækisins.

Stjórn Verkalýðs- og sjómannafélags Keflavíkur og nágrennis skorar  á Rio Tinto Alcan að ganga nú þegar í stað til samninga við launafólk í álverinu og skapa sátt á íslenskum vinnumarkaði. Að öðrum kosti verða verkalýðshreyfingin og atvinnurekendasamtökin ásamt stjórnvöldum að koma að deilunni þar sem þessir aðilar lögðu línurnar þegar verksmiðjurekstur hófst í Straumsvík.