Hundur hljóp á bifreið

Stór dökkur hundur hljóp á bifreið sem ekið var eftir Hringbraut í Keflavík síðdegis sl. fimmtudag. Hundurinn skall á frambretti bifreiðarinnar. Atvikið átti sér stað við gatnamót Hringbrautar og Mávabrautar.

Hundurinn hvarf út í náttmyrkrið jafn hratt og hann birtist. Ökumanni bifreiðarinnar var mjög brugðið, enda höggið mikið. Lögregla var kölluð til og leitaði hún að hundinum en fann ekki.

Ef einhver kannast við að hafa fengið heim til sín lemstraðan hund sl. fimmtudagskvöld, mætti viðkomandi hafa samband við lögregluna á Suðurnesjum.