Hrauná ógnar eystri varnargarðinum

Í háeginu í dag opnaðist heilmikil hrauná rétt aftan við eystri varnargarðinn á Fagradalsfjalli. Ljóst er að farvegir neðanjarðar eru að veita bráð að jaðri hraunbreiðunnar úr tjörninni ofar í hrauninu, segir í færslu sem Eldfjalla- og náttúruvárhópur Suðurlands setti á fésbókina í hádeginu.

Meginhraunáin úr gígnum liggur til austurs úr Geldingadölum yfir í nafnlausa dalinn. Hraunáin liggur þar mun hærra uppi heldur en hraunjaðarinn við varnargarðana. Því er ljóst að hraunjaðarinn mun einungis halda áfram að þykkna og skríða fram á við á meðan þær aðstæður eru fyrir hendi. Svona undanhlaup eins og nú eru í gangi koma því ekki á óvart.

Þegar spólað er til baka í vefmyndavél RÚV (hún er í beinu streymi hér að neðan) má greinilega sjá hvernig hraunjaðarinn við varnargarðinn lyftist upp nú fyrir hádegi, áður en hraunbráðinn braut sér loks leið út úr jaðrinum.