Heitavatnslögn tærðist utanfrá

Heitu vatni var aftur hleypt á aðveituæðina í Garð og Sandgerði á öðrum tímanum í nótt en þá höfðu þessi tvö sveitarfélög verið án hitaveitu í um hálfan sólarhring. Að sögn Víðis Jónssonar hjá HS Veitum er talið að gat hafi komið á einangrunarkápu á 300 mm einangraða stálpípu þannig að utanaðkomandi vatn komst að pípunni. Þegar það gerist tærast lagnir á stuttum tíma. Er talið að grjót eða steinn hafi legið upp við hólkinn og sargað á hann gat með tímanum.

Áður en hægt var að skipta um hluta leiðslunnar þurfti að tæma hana á allt að tveggja kílómetra kafla. Það tók nokkuð langan tíma því eins og starfsmenn hitaveitunnar segja, þá virðist geta lekið endalaust úr rörunum.

Suðuvinnu lauk kl. 23 í gærkvöldi en skipt var um 1,5 metra úr lögninni. Þá var vatni aftur hleypt á lögnina og hún lofttæmd. Vinnu á svæðinu lauk síðan kl. 05 í morgun. Íbúar í Garði og Sandgerði hafa eflaust fengið „kakólitað“ hitaveituvatn í morgun, sem er eðlilegt eftir að vatn fer af eins og í gær. Þá losnar um óhreinindi í lögnum sem fólk síðan losnar við með því að láta vatnið renna í einhvern tíma.

Mynd: Frá viðgerðum á Miðnesheiði í gærdag. Ljósmynd: Víðir Jónsson