Harður árekstur á Grindavíkurvegi

Harður árekstur varð á Grindavíkurvegi nú á fimmta tímanum í dag þar sem tvær bifreiðar rákust harkalega saman á gatnamótum við Bláalónsveginn. Þrennt slasaðist í árekstrinum og þurfti að flytja á sjúkrahús.

Ein sjúkrabifreið frá Grindavík var send á slysstað auk sjúkrabifreiðar og tækjabíls frá Reykjanesbæ. Það var ekki fyrr en björgunarliðið frá Brunavörnum Suðurnesja í Reykjanesbæ var komið á staðinn að þriðji sjúkrabíllinn frá var kallaður á vettvang.

Í samtali við Víkurfréttir sagði Jón Guðlaugsson, slökkviliðsstjóri Brunavarna Suðurnesja, að eitthvað hafi farið úrskeiðis við boðun björgunarliðs í dag. Slysið hafi orðið á svæði Slökkviliðs Grindavíkur en Neyðarlínan hafi boðað Brunavarnir Suðurnesja til aðstoðar og hafi útkallið verið óljóst. Gera má ráð fyrir að útkallið á Grindavíkurveg í dag verði skoðað sérstaklega.

Myndir frá slysavettvangi á Grindavíkuvegi síðdegis. Víkurfréttamyndir: Hilmar Bragi Bárðarson