Handtóku minnislausan mann
Sælgætisgrís einnig gripinn glóðvolgur.
Brotist var inn á veitingastað í umdæmi lögreglunnar á Suðurnesjum um helgina og þaðan stolið reiðufé og þremur kössum af bjór. Skömmu síðar var karlmaður á sextugsaldri handtekinn, grunaður um innbrotið. Hann var yfirheyrður, en bar við minnisleysi vegna ölvunar. Málið er í rannsókn.
Þá var piltur staðinn að verki við að hnupla sælgæti úr verslun. Starfsmaður verslunarinnar handsamaði hann, eftir að hann hafði gengið út með sælgætið án þess að greiða fyrir það, og gerði lögreglu viðvart.
Loks kom karlmaður á lögreglustöð og kærði þjófnað á timbri og rakaplasti. Það mál er einnig í rannsókn.
