Halldór í heimspressunni

Halldór Guðmundsson, framkvæmdastjóri Allt hreint við Holtsgötu í Njarðvík, náði ótrúlegum myndum í eldingaveðrinu sem gekk yfir Reykjanesskagann á mánudagsmorgun. Hann tók upp símann og hugðist taka videomyndir af eldingaveðrinu. Hann var nýbyrjaður að taka upp þegar TF-GAY, flugvél frá WOW, tók á loft frá Keflavíkurflugvelli.

Halldór beindi myndavélinni að flugvélinni og örfáum sekúndum síðar varð flugvélin fyrir eldingu. Myndefnið vakti strax mikla athygli og hefur farið víða um heim. Á Youtube-rás Sjónvarps Víkurfrétta hefur myndskeiðið fengið um 100.000 áhorf og á fésbók Víkurfrétta var áhorfið komið í 55.000 spilanir síðdegis í gær.

„Ég ætlaði nú bara að reyna að ná myndbandi af eldingunum. Svo sé ég flugvélina og beini upptökunni að henni og þá slær eldingum niður í flugvélina. Það er ótrúlegt að hafa náð þessu á myndband,“ segir Halldór í samtali við Víkurfréttir.

Erlendir miðlar á borð við BBC, TV2 og Discovery hafa sett sig í samband við Halldór og beðið um að fá að sýna myndbandið. Einnig deildi flug-Instagramsíðan „Megaplane“ myndbandinu þar sem það hefur nú fengið yfir 40.000 áhorf.

„Mánudagurinn fór nú eiginlega bara allur í að svara spurningum fjölmiðla,“ segir Halldór Guðmundsson. Myndin hér að ofan er úr myndskeiðinu sem hann tók. Án efa ein af fréttamyndum ársins.