Halda ekki fund með eigendum kísilvers

Bæjarstjórn Reykjanesbæjar tekur í dag til afgreiðslu fundargerð Umhverfis- og skipulagsráðs Reykjanesbæjar frá því á föstudag þar sem ráðið hafnaði beiðni Verkís ehf. sem óskaði fyrir hönd Stakksbergs ehf. eftir að skipulags- og matslýsing fyrir kísilverið í Helguvík verði tekin til meðferðar. Jafnframt var óskað eftir heimild til að vinna deiliskipulagsbreytingu í samræmi við ofangreinda skipulags og matslýsingu.

 

Í kjölfar höfnunar Umhverfis- og skipulagsráðs Reykjanesbæjar á málinu óskaði Stakksberg ehf. eftir fundi með bæjarstjórn áður en hún tæki málið fyrir í dag.

 

Bæjaryfirvöld í Reykjanesbæ höfnuðu því að taka á móti fulltrúum fyrirtækisins.

 

„Við töldum ekki eðlilegt að halda fund með þeim á þessu stigi málsins,“ segir Guðbrandur Einarsson, bæjarfulltrúi Beinnar leiðar, í samtali við Víkurfréttir.