Guðbjörg ráðin skólastjóri í Grindavík
- Aðstoðarskólastjórinn verður skólastjóri
Guðbjörg M. Sveinsdóttir hefur verið ráðin skólastjóri Grunnskóla Grindavíkur. Guðbjörg tekur við starfinu af Halldóru K. Magnúsdóttur sem lætur af störfum í sumar vegna aldurs. Fjórir sóttu um starfið.
Á vef Grindavíkurbæjar kemur fram að Guðbjörg hafi víðtæka reynslu af kennslu og stjórnun menntastofnanna. Auk grunnskólakennaraprófs hefur Guðbjörg lokið námi í náms- og starfsráðgjöf og MPA námi í opinberri stjórnsýslu. Hún var rekstrar- og grunnskólafulltrúi á Fræðsluskrifstofu Reykjanesbæjar í 15 ár og staðgengill fræðslustjóra. Hún starfaði áður sem náms- og starfsráðgjafi við Fjölbrautaskóla Suðurnesja og hefur verið aðstoðarskólastjóri við Grunnskóla Grindavíkur frá árinu 2012.
Guðbjörg býr í Njarðvík og er gift Oddgeiri Karlssyni, ljósmyndara en þau eiga tvö börn.
