Gróður og tré skemmd við Tjarnarsel

Það var dapurleg sjón sem blasti við börnum og kennurum leikskólans Tjarnarsels í Keflavík í morgun. „Við komuna í leikskólann lágu stórskemmd reynitré og plöntur eins og hráviður um fallega garðinn okkar,“ segir í færslu á fésbókarsíðu leikskólans.

 

„Fyrr í þessum mánuði unnu hér um 100 sjálfboðaliðar óeigingjarnt starf í þágu leikskólans við endurbætur og fegrun útisvæðisins. 

 

Þessir sjálfboðaliðar eru börn og foreldrar í leikskólanum, ömmur og afar, kennarar og aðrir velunnarar skólans.

 

Það er því afar sárt og illskiljanlegt fyrir smáa sem stóra hér í skólanum að einhver skuli gera svona lagað,“ segir jafnframt í tilkynningunni frá Tjarnarseli.

 

Þau sem einhverjar upplýsingar hafa um málið eru vinsamlegast beðin að hafa samband við leikskólastjóra Tjarnarsels.